Det blir ei markering inne på Tysværtunet i Aksdal kl. 11.00.
Avdelingsdirektør i Statens vegvesen, Astrid Eide er til stades, saman med Tysvær-ordførar Harald Stakkestad, og ordførar i Bokn, Kyrre Lindanger. Grunneigarane og naboane til prosjektet er også inviterte til denne markeringa.
Krysset mellom E39 og fylkesveg 780 på Susort har fått nye på- og avkøyringsfelt. Dette gjer det mykje tryggare og smidigare for trafikken som skal av og på E39.
– Nord for krysset er vegen i tillegg utvida med eit 1200 meter langt ekstra felt. At vegen no er breiare gjer det lettare for bilistane å køyre trygt forbi. Vi har også fått på plass midtdelar gjennom heile krysset, som er med på å auke trafikktryggleiken, seier prosjektleiar Einar Færaas. Han fortel at det også er bygd 250 meter ny gang- og sykkelveg, og 200 meter traktorveg. Færaas er svært nøgd med å gjere ferdig arbeidet til jul.
– Dette er ei god julegåve til dei mange som tålmodig har snigla seg gjennom anleggsområdet sidan i vår, meiner han.
